विराटनगर- सुनसरीको इटहरीस्थित यातायात ब्यवस्था कार्यालयबाट सवारी चालक अनुमतिपत्रको भुक्तानी डिजिटल माध्यमबाट गर्न सकिने भएको छ ।
सोमबार कार्यालयमा अनलाइन भुक्तानी सेवाका उद्घाटन गर्दै प्रदेशका आन्तरिक मामिला तथा कानुन मन्त्री रेवतीरमण भण्डारीले अनलाइनमार्फत रकम भुक्तानी सुरु गरिएपछि सेवाग्राहीमा सहजता हुने विश्वास ब्यक्त गरे।
सवारी चालक अनुमति पत्रको नवीकरणदेखि अन्य शुल्क भुक्तानी अनलाइनबाट हुने भएपछि सेवाग्रहीले विगतमा भोग्दै आएको समस्या हल हुने मन्त्री भण्डारीले बताए ।
यस सेवा अनुसार सेवाग्राहीले अब रकम भुक्तानीका लागि मोबाइल, ल्यापट र कम्पयुटर चलाउँदै घरबाटै गर्न सक्ने उनको भनाई छ । सेवा सुरु भएसंगै सेवाग्राहीले नयाँ लाइसेन्सको आवदेन, नवीकरणदेखि विभिन्न कर तिर्न सहज भएको कार्यालयले जनाएको छ ।
कार्यालयका अनुसार सवारीचालक अनुमति पत्रका लागि मन्त्रालयमा सूचीकृत भएका चिकित्सकसँग जाँच गरेपछि चिकित्सकले सोही समय अनलाइनमार्फत रेकर्ड समाविष्ट गर्ने र अर्कोदिन अनलाइनमार्फत नै भुक्तानी बिल लिन सकिने छ ।
त्यसैगरी, कार्यालयले आगामी साउनबाट भने प्रदेशमै सवारी अनुमति पत्रको छपाइ सुरु भएपछि सो पत्र लिनमात्रै कार्यालय पुग्नुपर्नेछ ।
यातायात व्यवस्था कार्यालय कोशीअन्तर्गत मोरङ, सुनसरी, झापा, इलाम, धनकुटा, उदयपुर र ओखलढुंगा गरी सात जिल्लाका ८ स्थानमा रहेका कार्यालयबाट सेवा प्रवाह हुने गरेको छ ।
