स्वास्थ्य मन्त्रालयअन्तर्गत रहेर काम गरिरहेका डाक्टर केशव श्रेष्ठ प्रशासनिक अन्याय, मनोवैज्ञानिक दबाब र झुटा आरोपका कारण आफू आत्महत्या गर्न लागेको भन्दै सम्पर्कविहीन भएका छन् ।
सोमबार बिहान फेसबुक स्टाट पोस्ट गरेलगत्तै उनी सम्पर्कविहीन भएका हुन् । निकटस्थहरूका अनुसार, उनको अन्तिम लोकेसन काठमाडौंको साततले (कपन क्षेत्र)मा देखिएको छ । हालको उनको फोन 'स्वीच अफ' रहेको आफन्तहरूले बताएका छन् । आफन्त र प्रहरी मिलेर उनको खोजी गरिरहेका छन् ।
दुई वर्षभन्दा बढी समय रामेछाप जिल्ला अस्पतालमा काम गरेका उनी जेठ अन्तिम साता हेटौँडा सरुवा भएका थिए । आफूले सेवा गरेको रामेछाप अस्पतालबाटै आफूमाथि अमानवीय व्यवहार र अन्याय गरिएको उनले फेसबुक पोस्टमा लेखेका छन् ।
अस्पतालमा काम गर्ने क्रममा आफूविरुद्ध झुटा आरोप लगाइएको, धम्की र दबाब दिइएको उनले उल्लेख गरेका छन् । डा. श्रेष्ठले केही कर्मचारी मिलेर आफूलाई मानसिक रूपमा गलाउने काम गरेको आरोप पनि लगाएका छन् । उनले केही व्यक्तिको नाम नै सार्वजनिक गरेका छन्, जसमा स्वास्थ्यमन्त्रीदेखि स्वास्थ्य सचिवसम्मको नाम छ । रामेछाप अस्पतालबाट आफूलाई राति ९ बजे परिवारसहित काठमाडौं आउन बाध्य पारिएको र स्वास्थ्य मन्त्रालयले सुरक्षा नदिएको गुनासो उनले गरेका छन् । मन्त्रालय र स्थानीय प्रशासनले पनि आफूलाई न्याय र सुरक्षा नदिएको उनको गुनासो छ । केही वर्षअघि मात्र बिहे गरेका डा. श्रेष्ठका २ वर्षकी छोरी र श्रीमती छन् ।
डा. श्रेष्ठले आफूले न्याय पाए मात्र आत्माले शान्ति पाउने पनि लेखेका छन् । उनले भनेका छन्, ‘असत्यको जित भएको देखेर बस्न मन लागेन । मलाई मार्न बाध्य पार्नेहरूलाई कानुनी कारबाही नहुँदासम्म मेरो आत्माले शान्ति पाउने छैन ।’
रामेछाप अस्पताललाई १५ बेडको सानो अस्पतालबाट बागमती प्रदेशकै दोस्रो उत्कृष्ट ५० बेड अस्पताल बनाउन सफल डा. श्रेष्ठको यो अवस्थाले सरकारी अस्पतालमा सेवा गर्ने चिकित्सकहरूको जटिल परिस्थिति उजागर गरेको छ ।
