इनरुवा । सुनसरी प्रहरीले सवारी दुर्घटनासम्बन्धी मुद्दामा संलग्न इनरुवा नगरपालिका-६ का वडाध्यक्ष सुमन थापाको खोजी तीव्र पारेको जनाएको छ। थापाविरुद्ध पक्राउ पुर्जी जारी भइसकेको छ भने उनी हालसम्म सम्पर्कविहीन रहेका छन्।
प्रहरीका अनुसार थापाको मोबाइल फोन अफ रहेको छ र उनी घर तथा आसपासका क्षेत्रमा समेत भेटिएका छैनन्। घटनापछि प्रहरीले विभिन्न स्थानमा खोजी टोली परिचालन गरेको जनाएको छ।
एक प्रहरी स्रोतका अनुसार, “सुमन थापा सम्पर्कमा नआई तर्किन खोजिरहेका छन् भने उनको नाम फरार सूचीमा समावेश गर्ने तयारी भइरहेको छ,” भने।
सवारी दुर्घटनामा परेका एक व्यक्ति गम्भीर घाइते भई अङ्गभङ्ग भएका छन्। यसबीच स्थानीयवासीहरूले वडाध्यक्ष थापालाई कानुनी प्रक्रियामा सहयोग गर्न आग्रह गरेका छन्।
