पाकिस्तानी महिलासँग विवाह गरेपछि भारतको केन्द्रीय रिजर्भ पुलिस बल (सीआरपीएफ) ले जवान मुनिर अहमदलाई जागिरबाट बर्खास्त गरेको छ।
सञ्चारमाध्यमहरूका अनुसार सीआरपीएफको ४१औँ बटालियनका सिपाही मुनिर अहमदले पाकिस्तानको सियालकोट निवासी मीनल खानसँग विवाह गरेपछि उनलाई जागिरबाटै बर्खास्त गरिएको हो।
उनले आफ्नी श्रीमतीको भिसा सकिएपछि पनि उनलाई अवैध रूपमा भारतमा राखेको दाबी पनि गरिएको छ। ‘मुनिर अहमदलाई सेवा आचरण र राष्ट्रिय सुरक्षाको लागि खतरा मानिएको छ। उनले भिसा नियम उल्लंघन गरेर मिनललाई भारतमा आश्रय दिएका छन्,’ सीआरपीएफले भनेको छ।
मिनल मार्च २०२५ मा छोटो अवधिको भिसामा भारत आएकी थिइन्। उनले दीर्घकालीन भिसाका लागि दिएको आवेदन भारतीय गृह मन्त्रालयमा विचाराधीन छ।
अप्रिल २२ मा पहलगाम आतंकवादी हमलापछि भारत सरकारले सबै पाकिस्तानी नागरिकको भिसा निलम्बन गरेको छ। पाकिस्तानी महिला मिनल खानलाई पनि देश छोड्न सूचना दिइएको थियो।
मिनलले भने आफूहरू निर्दोष रहेको भन्दै आतंकवादसँग कुनै सम्बन्ध नरहेको जिकिर सञ्चारकर्मीहरूसँग गरेको सञ्चारमाध्यमहरूले उल्लेख गरेका छन्।
