अमेरिकाको पेन्सिलभेनिया राज्यमा भएको गोलीकाण्डमा तीन प्रहरी अधिकारीको मृत्यु भएको छ भने दुई जना गम्भीर घाइते भएका छन्। प्रहरी अधिकारीहरूले एउटा मुद्दाको अनुसन्धान गरिरहेका बेला घटना भएको बताइएको छ।
पेन्सिलभेनिया राज्यका प्रहरी आयुक्त कर्नल क्रिस्टोफर पेरिसले प्रहरी कारबाहीमा बन्दुकधारीको समेत मृत्यु भएको बताएका छन्। घटनास्थलका तस्बिरहरूमा एक घाइते प्रहरी अधिकारीलाई मेडिकल हेलिकोप्टरले लगिएको देखिन्छ।
गोलीकाण्डका कारण नजिकैको स्प्रिंग ग्रोभ छिमेकमा रहेको विद्यालय केही समयका लागि बन्द गरिएको छ। त्यहाँका बालबालिकाहरूलाई सुरक्षित स्थानमा सारिएको छ। विद्यालय प्रशासनले गोलीबारीले विद्यालयलाई कुनै असर नगरेको बताएको छ।
अधिकारीहरूले यस आक्रमणबाट सर्वसाधारणलाई कुनै खतरा नभएको बताएका छन्। घटनाको अनुसन्धान भइरहेको प्रहरीले जनाएको छ।
