भारतको उत्तराखण्डको गंगनी क्षेत्रमा बिहीबार हेलिकप्टर दुर्घटना हुँदा छ जनाको मृत्यु भएको छ भने एक जना घाइते भएका छन्।
बिहान ८:५० बजेतिर यमुनोत्री धामबाट आउँदै गरेको निजी कम्पनीद्वारा सञ्चालित हेलिकप्टर गहिरो खोंचमा खस्दा यो घटना भएको हो।
मनेरी प्रहरी चौकीका प्रमुख मनोज अस्वालले दुर्घटनामा पाइलटसहित छ जना यात्रुको मृत्यु भएको बताए भने एक घाइते यात्रुलाई उपचारको लागि एम्स ऋषिकेश लगिएको बताए।
“भीटी-ओएक्सएफ दर्ता नम्बर भएको हेलिकप्टरमा क्याप्टेन रोबिन सिंहको रूपमा चिनिने पाइलट सहित सात जना सवार थिए। यो यमुनोत्री धामबाट आउँदै थियो। अलर्ट प्राप्त भएपछि, राज्य विपद् प्रतिक्रियाका टोलीहरू एसडीआरएफ फोर्स र स्थानीय प्रहरी तुरुन्तै घटनास्थलमा पुगेर खोजी तथा उद्धार कार्य सुरु गरे,” असवालले भने।
उनले हेलिकप्टर लगभग २०० देखि २५० मिटर गहिरो खोंचमा फेला परेको बताए। “स्थानीय प्रहरी र अन्य आपतकालीन एकाइहरूसँग मिलेर एसडीआरएफका कर्मचारीहरूले दुर्गम भूभागमा खोज र उद्धार कार्य सञ्चालन गरिरहेका छन्”, उनले थपे।
मृत्यु हुनेमा चार जना मुम्बईका र दुई जना आन्ध्र प्रदेशका छन्। उत्तराखण्डका मुख्यमन्त्री पुष्कर सिंह धामीले घटनाको अनुसन्धान गर्न आदेश दिएका छन्।
धामीले मृत्यु भएकाहरूप्रति समवेदना व्यक्त गर्दै घाइतेहरूलाई सबै सम्भव सहयोग उपलब्ध गराउन स्थानीय प्रशासनलाई निर्देशन दिएका छन्। उनले राहत र उद्धार कार्यका लागि एसडीआरएफ र जिल्ला प्रशासनका टोलीहरू घटनास्थलमा रहेको बताए।
हेलिकप्टर दुर्घटनापछि केदारनाथको लागि हेलिकप्टर सेवा केही समयका लागि रोकिएको थियो, तर पछि पुनः सुरु गरिएको थियो।
