रास्वपा र राप्रपाले भिजिट भिसा प्रकरणमा संसदीय वा न्यायिक छानबिन समिति नबनाइएको भन्दै मंगलबार पनि प्रतिनिधिसभा बैठक बहिष्कार गरेका छन् ।
सभामुख देवराज घिमिरेले बैठक सुरु भएको घोषणा गरेपछि दुवै पार्टीका सांसदहरूले उठेर विरोध जनाएका थिए । त्यसपछि सभामुख घिमिरेले रास्वपाका सांसद शिशिर खनाललाई समय दिएका थिए । ‘हामीले लगातार माग गर्दै आएको भिजिट भिसा सेटिङ प्रकरणमा छानबिन गर्न संसदीय विशेष समिति गठन गरिएन । जबसम्म छानबिनको प्रक्रिया सुरु हुँदैन, तबसम्म हाम्रो विरोध जारी रहनेछ,’ उनले भने ।
खनालले मन्त्रिपरिषद्का केही सदस्यहरूसमेत विभिन्न काण्डमा मुछिएको उल्लेख गर्दै ती प्रकरणमा पनि छानबिन हुनुपर्ने माग गरे । त्यसपछि सभामुख घिमिरेले राप्रपाकी सांसद विना लामालाई बोल्न समय दिएका थिए । ‘हामीले सधैँजसो उठाउँदै आएको माग भिजिट भिसा प्रकरणमा छानबिन समिति गठन अझैसम्म पूरा भएको छैन । त्यसैले हामी बैठक बहिष्कार गर्छौं र आजको भत्तासमेत नलिने निर्णय गरेका छौँ,’ उनले भनिन् ।
त्यसपछि रास्वपा र राप्रपाका सांसदहरूले बैठक बहिष्कार गरेका हुन् । १३ जेठयता रास्वपा र राप्रपाले लगातार संसद बहिष्कार गर्दै आएका छन् ।
