सुनसरी। सुनसरीको भोक्राहा नरसिंह गाउँपालिका–८ सोनियाही क्षेत्रबाट सशस्त्र प्रहरीले ठूलो परिमाणको गाँजा बरामद गरेको छ। अवैध लागूऔषध नियन्त्रणअन्तर्गत गरिएको विशेष अपरेशनमार्फत २२ किलो गाँजा बरामद गरिएको हो।
सशस्त्र प्रहरी बल नेपाल नम्बर ४ गण मुख्यालयका अनुसार सो गाँजा पल्सर मोटरसाइकलमा राखिएको झोलाभित्र लुकाइछिपाइ ल्याइँदै थियो। नियमित गस्ती र सूचनाप्राप्त भएपछि तत्काल निगरानी बढाइएकाले उक्त सामान नियन्त्रणमा लिन प्रहरी सफल भएको जनाइएको छ। रोक जाँच गर्न खोज्दा प्रहरी देख्नेबित्तिकै चालकले मोटरसाइकल गुडाउँदै मोटरसाइकल छाडेर पैदल भागेको बताइएको छ।
बरामद गरिएको गाँजा र मोटरसाइकल आवश्यक अनुसन्धान र कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ। घटनास्थलबाट प्रहरीले मोटरसाइकल चालकको मोबाइल फोन र उसले लगाएको शर्ट समेत फेला पारेको छ। प्रहरीले यी प्रमाणहरूले घटनामा संलग्न कारोबारीलाई पहिचान गर्न र पक्राउ गर्न सहज हुने अपेक्षा गरिएको छ।
सशस्त्र प्रहरी बल नेपाल बोर्डर आउट पोस्ट उल्टीका प्रमुख सशस्त्र प्रहरी नायब निरीक्षक उत्तम कार्कीको सफल नेतृत्व र प्रभावकारी कार्यशैलीका कारण उक्त बरामद कार्य सम्भव भएको हो। कार्कीले भने, “हामी अवैध लागूऔषध तथा आपराधिक गतिविधिबाट समाजलाई सुरक्षित बनाउन निरन्तर सक्रिय छौँ। सीमावर्ती तथा संवेदनशील क्षेत्रहरूमा गस्ती र चेकजाँचलाई अझ कडाइ गर्नेछौँ।”कार्कीले थपे, “हामीलाई प्राप्त विशेष सूचनाका आधारमा टोली परिचालन गरेर यो सफल बरामद गर्न सक्यौँ। अवैध कारोबारमा संलग्न जो कोहीलाई कानूनी दायरामा ल्याउन सशस्त्र प्रहरी प्रतिबद्ध छ।”
प्रहरीका अनुसार हालसालै सुनसरीका विभिन्न स्थानमा सशस्त्र प्रहरीद्वारा लागूऔषध, अवैध सामान र तस्करीजन्य वस्तु नियन्त्रणमा लिने कार्यलाई तीव्रता दिइएको छ। यसअघि पनि कार्कीको टोलीले विभिन्न अवैध सामग्री बरामद गर्न सफल हुँदै आएको छ।
यस प्रकारका कारबाहीहरूले स्थानीय बासिन्दामा सुरक्षाप्रति विश्वास बढाएको र अवैध कारोबारमा संलग्न समूहहरूलाई सन्देश पुगेको प्रहरीको भनाइ छ।
