पर्साको पकहाँ मैनपुर गाउँपालिकाको गाउँपरिषद अहिलेसम्म हुन नसक्दा त्यहाँ करार र ज्यालादारीमा कार्यरत ६५ भन्दा बढी कर्मचारीले विगत ६ महिनादेखि तलब पाउन सकेका छैनन्। अहिले दशैंमा पनि उनीहरू तलब भत्ता पाउनबाट बञ्चित भएका छन्।
गाउँपालिका अध्यक्ष सुरेश मेहताको हठका कारण गत असारमै हुनुपर्ने गाउँ परिषद् अहिलेसम्म पनि हुन नसक्दा आफूहरूले गत चैतदेखि तलब भत्ता पाउन नसकेको कर्मचारीहरूको गुनासो छ।
पकहाँमैनपुर गाउँपालिकामा आर्थिक वर्ष २०८२/८३ का लागि संघ सरकारले विकास खर्चतर्फ ८ करोड ६५ लाख रुपैयाँ छुट्याए पनि अध्यक्ष मेहताले एकलौटी ढंगले १६ करोडको बजेट सूत्रमा राख्नुपर्ने अडान लिँदै आएकाले परिषदमा ढिलाइ भएको गाउँपालिकाका प्रमुख प्रशासकीय अधिकृत देवनाथ साहले बताए।
उनका अनुसार पालिकामा आएको बजेटभन्दा दोब्बरको योजना बनाउँदा कामको भुक्तानी असम्भव हुने स्पष्ट हुँदा हुँदै पनि अध्यक्ष मेहताले बारम्बार बैठक छाड्ने र सहमति नखोज्ने प्रवृत्तिले समस्या गहिरिएको हो। ‘गाउँ परिषद् सम्पन्न गरी आफूलाई अख्तियारी दिए दुई दिनमै तलब दिन सक्छु,’ अधिकृत साहले भने। करार र ज्यालादारीका कर्मचारीले विगत ६ महिनादेखि तलब नपाउँदा चाडबाडमै आर्थिक संकट झेल्न बाध्य भएको प्रमुख प्रशासकीय अधिकृत साहको गुनासो छ।
वडा नम्बर १ का वडाध्यक्ष विनोद मेहताले पालिका अध्यक्ष मेहताको व्यक्तिगत स्वार्थ र हठकै कारण गाउँपालिकालाई अनिर्णयको बन्दी बनाएर सम्पूर्ण जनप्रतिनिधि तथा कर्मचारीलाई दुःख दिएको आरोप लगाए। उनका अनुसार संघ सरकारले छुट्याएको ८ करोड ६५ लाख मध्ये ५ वटा वडाका लागि ८०–८० लाख गरी ४ करोड, गाउँपालिका उपाध्यक्षलाई १ करोड २० लाख र गाउँपालिका अध्यक्षलाई ३ करोड ४५ लाख बराबरको योजना दिने सहमति भएको थियो। तर, गाउँपालिका अध्यक्ष मेहताले त्यसलाई नमान्दै १६ करोडको योजना शीर्षकमा राख्नुपर्ने दबाब दिँदा गाउँ परिषद् हुन नसकेको वडाध्यक्ष मेहताले बताए।
‘जनताको भोटबाट हामी पनि जितेका हौं, विकास गर्ने बजेट हामीलाई चाहिएन र ?’ वडाध्यक्ष विनोद मेहताले भने। यसैबीच गाउँ परिषद् लामो समयदेखि नबोलाइएपछि गाउँपालिका उपाध्यक्षसहित ५ वटै वडाध्यक्षले लिखित रूपमा परिषद् बोलाउन माग गरेका छन्। तर, गाउँपालिका अध्यक्ष मेहताले अहिलेसम्म स्पष्ट मिति नतोकेका कारण गाउँपालिकाका सम्पूर्ण काम अवरुद्ध बनेको छ।
