अजमल अन्सारी
सुनसरी । सुनसरीको रामधुनी नगरपालिका–६ पिडारीस्थित सडक खण्डबाट ठूलो परिमाणमा लागू औषध गाँजासहित एक भारतीय नम्बर प्लेटको एम्बुलेन्स र चालकलाई प्रहरीले नियन्त्रणमा लिएको छ।
शनिबार राति १० बजे गोप्य सूचनाका आधारमा इलाका प्रहरी कार्यालय ईटहरी, इलाका प्रहरी कार्यालय पकली र प्रस्तावित इलाका प्रहरी कार्यालय रामधुनीबाट खटिएको संयुक्त प्रहरी टोलीले रामधुनी क्षेत्र आसपासको सम्पूर्ण सडक ब्लक गरी BR38P5414 नम्बरको भारतीय एम्बुलेन्स रोकेर चेकजाँच गरेको थियो।
जाँचका क्रममा उक्त एम्बुलेन्समा कालो प्लास्टिकभित्र सेतो बोरामा प्याक गरिएको अवस्थामा ३०–३० केजीका ६ बोरा लागू औषध गाँजाजस्तो देखिने पदार्थ फेला परेको प्रहरीले जनाएको छ। बरामद गरिएको गाँजाको कुल तौल १८० केजी रहेको छ।
उक्त एम्बुलेन्स चलाइरहेका सुनसरी बराहक्षेत्र नगरपालिका–४ का २५ वर्षीय श्रीराजकुमार साहलाई प्रहरीले पक्राउ गरेको छ। पक्राउ परेका साह र बरामद सामग्रीलाई इलाका प्रहरी कार्यालय पकलीमा ल्याई थप अनुसन्धान भइरहेको इलाका प्रहरी कार्यालय पकलीले जनाएको छ।
प्रहरीका अनुसार लागू औषध ओसारपसारमा प्रयोग हुँदै आएको एम्बुलेन्स नियन्त्रणमा लिइनु ठूलो सफलता मानिएको छ। घटनासम्बन्धमा आवश्यक अनुसन्धान अघि बढाइने प्रहरीले जनाएको छ।
