सशस्त्र प्रहरी बलले सिरहाबाट ठूलो परिमाणको लागुऔषध गाँजा बरामद गरेको छ। सशस्त्र प्रहरी इनर्वा सिरहा गुल्मबाट सशस्त्र प्रहरी नायव उपरिक्षक नन्द राज राईको कमाण्डमा खटिएको टोलीले शुक्रबार बिहान करिब ३:३० बजे उक्त गाँजा बरामद गरेको हो।
विशेष सूचनाको आधारमा सशस्त्र प्रहरीको गस्ती टोली जिल्ला सिरहाको भगवानपुर गाउँपालिका-२ स्थित बलान खोला कासघारी पुगेको थियो। सो स्थानमा लुकाई छिपाई राखिएको अवस्थामा ९ बोरा लागुऔषध गाँजा फेला परेको सशस्त्र प्रहरीले जनाएको छ। बरामद भएको गाँजाको कुल तौल २१९.४ किलोग्राम रहेको छ।
बरामद गाँजालाई सशस्त्र प्रहरीले आवश्यक कानुनी कारबाहीका लागि नेपाल प्रहरीलाई बुझाउने प्रक्रिया अगाडि बढाएको जनाएको छ। यति ठूलो परिमाणमा गाँजा कसले लुकाएको थियो र यसको तस्करीमा संलग्न गिरोहको पहिचानका लागि अनुसन्धान अगाडि बढ्ने प्रहरीले बताएको छ।
