नेपाल शिक्षक महासंघले विद्यालय शिक्षा विधेयक २१ साउनभित्र प्रतिनिधिसभाबाट पारित गर्न सरकारलाई अल्टिमेटम दिएको छ । उक्त म्यादभित्र विधेयक पारित नभए विगतको भन्दा शक्तिशाली आन्दोलन गर्ने चेतावनी महासंघले दिएको छ ।
महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाले संयुक्त विज्ञप्ति जारी गर्दै हालसम्मको अवस्था विश्लेषण गर्दा राज्य पक्ष फेरि पनि शिक्षक तथा कर्मचारीलाई धोका दिने प्रयासमा रहेको देखिएको उल्लेख गरेका छन् । ‘संसदको शिक्षा, स्वास्थ्य तथा सूचना प्रविधि समितिमा चलिरहेको छलफल शीघ्र टुंग्याई विगतका सहमतिअनुसारको विद्यालय शिक्षा विधेयक प्रतिनिधि सभामा
पेस गरी कम्तीमा २१ साउनभित्र पारित गराउन सम्बन्धित सबै पक्षको गम्भीर ध्यानाकर्षण गराउँछौँ,’ विज्ञप्तिमा भनिएको छ । महासंघले २१ साउनसम्ममा विधेयक पारित नभए वा सहमतिविपरीतका प्रावधानसहित विधेयक अघि बढेमा कडा आन्दोलन गर्ने चेतावनी दिएको छ । ‘विगतमा भन्दा कडा र सशक्त आन्दोलन गर्नेछौँ, जसको सम्पूर्ण जिम्मेवारी राज्यपक्षले लिनुपर्छ,’ विज्ञप्तिमा भनिएको छ । महासंघले आन्दोलनका कार्यक्रम आवश्यकताअनुसार यथासमयमा सार्वजनिक गरिने जनाएको छ ।
