सिद्धार्थ बैंक लिमिटेडले चालु आर्थिक वर्ष २०८१/८२ को चौथो त्रैमासिक अवधिमा उल्लेखनीय आर्थिक प्रगति गरेको छ। बैंकले प्रकाशित गरेको अपरीक्षित वित्तीय विवरणअनुसार सो अवधिमा बैंकको खुद नाफा तीन गुणाले वृद्धि भई १ अर्ब ८६ करोड रुपैयाँ पुगेको छ।
गत वर्ष सोही अवधिमा बैंकले ५८ करोड रुपैयाँ नाफा कमाएको थियो। यस वर्षको नाफाको आधारमा बैंकले शेयरधनीलाई १३.२२ प्रतिशत लाभांश वितरण गर्न सक्ने अवस्था रहेको उल्लेख छ।
बैंकको कुल सञ्चालन नाफा पनि १०.२४ प्रतिशतले वृद्धि भई ३ अर्ब ३९ करोड रुपैयाँ पुगेको छ। यसमा खुद व्याज आम्दानी ८ अर्ब ४४ करोड, सेवा शुल्क तथा अन्य आम्दानी १५.०९ प्रतिशतले वृद्धि भई १ अर्ब ६४ करोड र कुल आम्दानी ११.८२ प्रतिशतले बढेर ११ अर्ब १६ करोड रुपैयाँ पुगेको उल्लेख गरिएको छ।
कर्जामा सन्तुलित वृद्धि, एनपीएल २.६२ प्रतिशत
बैंकले जोखिम न्यून कर्जालाई प्राथमिकता दिँदै कर्जा पोर्टफोलियो सन्तुलित बनाएको जनाएको छ। यस अवधिमा गैर-कार्यक्षम कर्जा (NPL) २.६२ प्रतिशतमा सीमित राखिएको छ, जुन वित्तीय क्षेत्रका लागि सन्तोषजनक मानिन्छ।
बैंकको कुल निक्षेप १६.१६ प्रतिशतले वृद्धि भई २ खर्ब ८० अर्ब रुपैयाँ र कर्जा लगानी ९.७६ प्रतिशतले वृद्धि भई २ खर्ब १४ अर्ब रुपैयाँ पुगेको छ।
सूचकहरूमा मजबूती, स्प्रेड दर ३.९८%
प्रति शेयर आम्दानी (EPS) २४.१ रुपैयाँ पुगेको छ भने वास्तविक EPS १३.२२ रुपैयाँ रहेको छ। प्रति शेयर नेटवर्थ २१९.९७ रुपैयाँ पुगेको छ। दोस्रो बजारमा P/E अनुपात १५.९३ रहेको छ।
बैंकको पुँजी पर्याप्तता अनुपात ११.७७ प्रतिशत कायम छ भने कर्जा–निक्षेप अनुपात ७६.९२ प्रतिशत पुगेको छ। स्प्रेड दर ३.९८ प्रतिशतमा स्थिर रहँदा औसत ब्याजदर गत वर्षको तुलनामा घटेर ६.४२ प्रतिशतमा झरेको छ।
