धनकुटा । धनकुटामा सशस्त्र प्रहरी बलले ठूलो परिमाणमा लागूऔषध गाँजासहित एक कार नियन्त्रणमा लिएको छ।
बुधबार बिहान साँगुरीगढी गाउँपालिका–६ नमस्ते झरनास्थित कोशी लोकमार्गमा चेकजाँचका क्रममा सशस्त्र प्रहरी बल नेपाल विपद् व्यवस्थापन बेस मुलघाटको टोलीले कार जाँच गर्न रोक्दा उक्त सवारी फरार भएको थियो।
पछ्याउँदा दुर्घटनामा परेर रोकिएको कारमा खोजतलास गर्दा १२ वटा बोरामा प्याक गरिएको ४ सय २१ किलो गाँजा फेला परेको सशस्त्र प्रहरी बलका सह–प्रवक्ता डीएसपी शैलेन्द्र थापाले जानकारी दिए। उनका अनुसार कार चालक भने घटनापछि फरार भएका छन्।
बरामद कार र गाँजा आवश्यक अनुसन्धान तथा कारबाहीका लागि सम्बन्धित निकायमा बुझाउने तयारी भइरहेको प्रहरीले जनाएको छ।
सशस्त्र प्रहरीले लागूऔषध तथा आपराधिक गतिविधि नियन्त्रणमा चेकजाँचलाई कडाइका साथ अघि बढाइएको पनि जनाएको छ।
